Ana Laíns é unha das maiores intérpretes da música portuguesa dos últimos anos. A súa música abarca varios xéneros como o jazz, a bossa nova, música popular e, especialmente o fado. Conta con varios galardóns, dous traballos discográficos en solitario e un terceiro en proceso. O próximo 25 de agosto actuará xunto á Agrupación Musical de Goián na Praza do Seixo en Tomiño.

Ana Laíns canta por primeira vez en público aos 6 anos. Dende cedo, a artista nacida en Tomar (Portugal) descobre o seu talento innato para a música e aos 15 anos canta o seu primeiro fado. No ano 1999 foi a vencedora da “Grande noite do Fado de Lisboa” e, a partir dese momento, impulsa a súa carreira musical actuando en Francia, Alemaña, Bélxica, Luxemburgo e nos EEUU.

No 2006 sae a luz o seu primeiro álbum “Sentidos” producido musicalmente por Diogo Clemente, onde a artista interpreta poemas dos máis talentosos escritores de fado como son Florbela Espanca, Lídeia Oliveira ou António Ramos entre outros. A sobriedade e a beleza deste álbum consagrou a Ana Laíns como unha gran revelación por dar unha nova cor ao fado e á música portuguesa.

Despois duns anos participando en varios traballos discográficos lanza no 2010 “Quatro Caminhos”, o seu segundo álbum producido de novo por Diogo Clemente. Entre os temas deste disco atópase “Não sou nascida do fado”, o primeiro fado escrito pola propia Ana Laíns.

Nas xiras posteriores Ana Laíns conseguiu encher grandes salas en cidades como Roterdam, Amsterdam ou Berlín. No ano 2011 a prensa holandesa recoñeceu a “Quatro Caminhos” como un dos 10 mellores discos do ano na área de Jazz e World music.

Ana Laíns foi nomeada Embaixadora das Comemorações dos 8 Séculos de Língua Portuguesa (2014). Este recoñecemento, xunto a paixón que ten pola súa lingua, ficarán rexistrados no seu próximo traballo discográfico.